د «انسان» او علومو اکاډمۍ ترمنځ د ګډې همکارۍ هوکړه‌لیک

د دې هوکړې په بنسټ به دواړه لوري د ګډو څېړنو، د څېړنیزو منابعو څخه د ګټې اخیستنې، ظرفیت لوړونې، کنفرانسونو، سمینارونو او د خپرونو په برخه کې ګډ پروګرامونه ترسره کوي.

د انسان څېړنیز بنسټ او د افغانستان د علومو اکاډمۍ ترمینځ د روان کال د دلوې په پنځمه د ګډو علمي، څېړنیزو او فرهنګي همکاریو هوکړه لیک لاسلیک کړ.

دغه هوکړه لیک د علومو اکاډمۍ د عمومي رئیس ډاکټرعبدالظاهر شکیب په شتون کې د انسان څېړنیز بنسټ عمومي رییس فهیم کریم او د اکاډمۍ د بشري علومو د برخې مرستیال سرمحقق ډاکټر محمد علم اسحاق‌زي لخوا امضاء شو.

د علومو اکاډمۍ عمومي رئیس عبدالظاهر شکیب په خپلو خبرو کې زیاته کړه؛ «د علمي همکاریو پراخوالی د علومو اکاډمۍ یو له مهمو موخو څخه دی او وویل چې معتبرې علمي څېړنې د هېواد په پرمختګ کې رغنده رول لري او موږ په دغه برخه کې د څېړونکو، علمي او تحقیقي مرکزونو طرحو او پيشنهادونو ته سترګې په لاره یو».

بله لورته د انسان څېړنیز بنسټ عمومي رئیس فهیم کریم په خپلو خبرو کې وویل؛ «دا هوکړه‌لیک به د څېړنو، خپرونو او اختصاصي پروګرامونو په اجراء کې د یوې مشترکې اجنډاء په مرسته پلې شي. هیله ده چې «انسان» وکولای شي هغه رسالت ته چې لري، له علومو اکاډمۍ سره د چارو په سمونتیا کې موثره ونډه واخلي».

د دې هوکړې په بنسټ به دواړه لوري د ګډو څېړنو، د څېړنیزو منابعو څخه د ګټې اخیستنې، ظرفیت لوړونې، کنفرانسونو، سمینارونو او د خپرونو په برخه کې ګډ پروګرامونه ترسره کوي.

په پای کې د هوکړه لیک د عملي کولو له پاره د یوې ګډې کمېټي د جوړیدنې په اړه خبرې وشوې، څو اجنډاء جوړه او د یوه میکانیزم له مخې کارونه پیل شي.